- O Partido Popular desvela que ante a falta de xestión de catro anos, o recurso desesperado do goberno local é o de asfaltar eiras, acondicionar accesos a fincas particulares e colocar espellos e farolas
- Os populares reclaman que todas as obras aprobadas se contraten mediante concurso público, evitando a opacidade e o amiguismo que caracterizou toda a xestión de Regos
- “Se Regos quere facer campaña, que a pague do seu peto, e non cos cartos dos impostos de todos os veciños”, afirma Martínez Sanjurjo
Ordes, 18 de abril de 2015.- A modificación de crédito por valor de 434.500 euros aprobada
onte polo Concello de Ordes está orientada a financiar obras executadas por
empresas amigas do alcalde durante a campaña electoral, vulnerando así os máis
elementais principios democráticos, razón pola que o Partido Popular votou en
contra da medida.
José
Luis Martínez Sanjurjo, portavoz municipal do Partido Popular de Ordes e
candidato á Alcaldía, explica que a medida aprobada onte a instancias do grupo
de Goberno co apoio do PSOE e de CdG se enmarca na estratexia de incentivación
do voto cautivo, como xa fixeran nas municipais de hai catro anos.
Asfaltando eiras
Desvela
Martínez Sanjurjo que ante a falta de xestión de todo un mandato co que
convencer ao electorado, o actual goberno de Ordes recorre ao asfaltado de
eiras, acondicionamento de accesos a fincas particulares e colocación de
espellos e farolas, nun intento desesperado de buscar apoios nas municipais do
vindeiro 24 de maio.
Que se planifiquen e transparenten as obras
“Desde
o Partido Popular non estamos en contra de que se melloren os equipamentos
públicos, pero esiximos que as obras se planifiquen seguindo criterios
obxectivos e se adxudiquen mediante concurso público, con transparencia, en
lugar de facelo a dedo arredor de un mantel para favorecer a determinadas
empresas amigas do alcalde”, agrega Martínez Sanjurjo.
Para
o candidato popular, “se Regos quere facer campaña, que a pague do seu peto, e
non cos cartos dos impostos de todos os veciños a través de obras precipitadas
que, lonxe de procurar o interese xeral, buscan unicamente o rédito electoral”.
Nesta
liña, José Luis Martínez conclúe: “Se o exercicio 2014 se pechou con superávit
foi pola mala execución do proxecto orzamentario, ¿por que non se acometeron as
obras antes de agora, ao longo do ano pasado, sen necesidade de agardar ao mes das
Eleccións?”.