- No mercado municipal creáronse novos postos de venda e mellorouse a accesibilidade
- No parque industrial, os traballos subvencionados polo departamento autonómico consistiron na pavimentación das vías principais
- A delegada territorial da Xunta na provincia, Belén do Campo, xunto co alcalde, Manuel Regos, supervisou hoxe o resultado destes proxectos
Ordes, 5
de febreiro de 2015.- A delegada territorial da Xunta
na provincia, Belén do Campo, visitou esta mañá o concello de Ordes, para
supervisar o resultado de diversos proxectos subvencionados pola Consellería de
Economía e Industria no municipio, que en total supuxeron un investimento de preto
de 350.000 euros.
En primeiro lugar, Do Campo, acompañada polo
alcalde, Manuel Regos, e o concelleiro e voceiro do grupo municipal do Partido
Popular, José Luis Martínez, desprazouse á praza de abastos, onde veñen de
rematar os traballos para a creación de novos postos de venda na planta baixa e
mellorar os xa existentes, así como para acondicionar a planta superior para
habilitar outros novos. A subvención concedida neste caso foi de 112.500 euros,
que se suma á xa consignada no ano anterior, de 118.000 euros, que serviu para
dotar as dependencias dun acceso para persoas con mobilidade reducida e adaptar
os aseos para discapacitados, ademais de mellorar a instalación eléctrica a
través de criterios de eficiencia enerxética e de reparar a fachada.
A delegada territorial explicou que estas
obras forman parte do programa de apoio aos concellos galegos para o impulso
das prazas de abastos e mercados tradicionais por parte do Goberno galego,
avanzando así no obxectivo de consolidar estas instalacións como líderes na
venda de produto fresco e de calidade. A convocatoria deste ano, dotada con
preto de 3 millóns de euros e cofinanciada con fondos Feder, permanecerá aberta
á presentación de solicitudes ata o vindeiro 23 de febreiro.
Subvención
de ata o 80% do proxecto
Tras a visita ao mercado, Do Campo e os
representantes municipais desprazáronse ata o polígono empresarial onde
comprobaron o estado das dúas vías principais, que veñen de ser pavimentadas cos
fondos obtidos a través das axudas de Economía e Industria habilitadas para
este fin, unha contía que, no caso de Ordes, ascendeu a 119.200 euros, é dicir,
o 80% do custe total do proxecto. Aquí, as actuacións incluíron o desbroce e
limpeza de gabias, o fresado do pavimento e a reposición da capa de rodaxe con
aglomerado en quente e a reposición da sinalizacións horizontal e vertical.
A máxima representante do Goberno galego na
provincia indicou que esta axuda enmárcase no programa de apoios impulsado
desde o departamento autonómico para a habilitación e mellora de
infraestruturas nos parques empresariais. “A través destas liñas de subvencións
impulsarase a súa actividade industrial, xerando postos de traballo e
mellorando a competitividade do tecido empresarial”, apuntou.
En total, 21 concellos da provincia da Coruña beneficiáronse
neste último ano destas subvencións, que suman un investimento de 1,8 millóns
de euros. En toda Galicia, o programa consignou 4,2 millóns de euros,
“configurando un dos orzamentos máis importantes desde a súa posta en marcha”,
destacou Do Campo. As iniciativas obxecto de subvención abarcaron eidos
diversos, como o aforro e a eficiencia no gasto enerxético, a creación de novas
plantas de depuración de augas, a xestión de residuos, as vías de acceso ou a
instalación de sistemas de seguridade e vixilancia.
