- A xestión de Regos sitúa a Ordes entre os concellos galegos con maior débeda por habitante; é o concello coruñés que menos cartos dedica a protección e promoción social, malia que os seus ingresos medran cada ano cos impostos que cobra aos veciños
- Martínez Sanjurjo denuncia no Pleno o “abuso continuado das adxudicacións a dedo, sempre para as empresas amigas do alcalde e sen dar publicidade á contratación”
- A partida pa investimentos redúcese un 17% respecto a 2014, pero o importe destinado a amortizar débeda supera nun 32% os investimentos directos con fondos propios
Ordes, 26 de xaneiro de 2015.- O Partido Popular de Ordes votou
hoxe en contra dos orzamentos municipais para o ano 2015 por entender que non
responden ás necesidades da vila e das parroquias, malia as diferentes medidas
impulsadas pola Administración central, autonómica e local para axudar ao
Goberno local.
No Pleno extraordinario
celebrado esta mañá para aprobar os Orzamentos de 2015, o portavoz municipal do
Partido Popular de Ordes, José Luis Martínez Sanjurjo, recordou que o Concello
de Ordes tivo que ser rescatado polo Goberno central para poder facer fronte a
unha “débeda municipal millonaria” derivada de múltiples facturas impagadas,
“moitas delas xurdidas do mercadeo de votos da campaña das municipais de maio de 2011”.
Recordou tamén que as medidas de
apoio aos concellos impulsadas por outras administracións permitiron reducir os
xuros do Concello de Ordes dun 7% ao 1%, o que implica un aforro de máis de
600.000 euros. Con todo, en 2015, o Concello de Ordes deberá destinar 549.000
euros á amortización da débeda, un 32% máis que a partida destinada a
investimentos con fondos propios e situada en tan só 417.000 euros, dentro dun
orzamento global de 8,5 millóns de euros.
Martínez Sanjurjo cuestionou tamén
esta redución da partida do anexo de investimentos, que pasa dos 510.000 euros
previstos inicialmente para 2014, aos 417.000 euros de 2015, o que supón unha
caída do 16,7% sobre o exercicio anterior.
Neste escenario, o voceiro do
Partido Popular constatou que o Goberno
de Regos non garante os investimentos mínimos necesarios para atender as necesidades
da vila e das parroquias. Criticou tamén o “abuso continuado das adxudicacións
a dedo, sempre para as empresas amigas do alcalde, sen dar publicidade aos
procedementos de contratación”.
Máis impostos para pagar a débeda xerada por Regos
Fronte aos argumentos manexados
desde a Alcaldía, Martínez Sanjurjo lembrou que Ordes se sitúa no posto 16
entre os concellos galegos máis endebedados, cunha débeda por habitante que
duplica á medida da Comunidade. Ao tempo, Ordes é o quinto concello galego e o
primeiro da provincia da Coruña que
menos cartos destina as protección e promoción social.
Sen embargo, a ausencia de
investimentos e prestacións municipais contrasta coa crecente presión fiscal á que se
ven sometidos os veciños de Ordes. O incremento da recadación por IBI de urbana
permitiu ao Concello de Ordes incrementar os seus ingresos en 450.000 euros/ano
desde o ano 2013. En 2015, a subida implicará uns ingresos adicionais de
110.000 euros para as arcas municipais.
O portavoz municipal do Partido
Popular referiuse tamén á hipocresía do equipo de Goberno, que malia a ter solicitado
propostas á oposición para incorporar aos Orzamentos, rematou por ignoralas.
Como exemplo, sinalou que o PP local propuxera incorporar aos Orzamentos de
2015 un Plan integral de mantemento e limpeza das estradas de titularidade
municipal, incluíndo tarefas de desbrozamento; a mellora da sinalización horizontal
da vila (aínda sen rematar); a posta en servizo dos saneamentos xa executados
en Ordes, Ardemil e Buscás; a execución de beirarrúas no núcleo urbano, ou as obras de mellora nas instalacións do CEIP
Campomaior que son de titularidade municipal. Esta última, proposta polo PP, foi
finalmente “fagocitada” polo PSOE, socio de Regos, que a trata de presentar
como unha proposta propia, cando a realidade é que copiou unha iniciativa
rexistrada meses atrás polo PP, e daquela votou en contra da aprobación da
moción dos populares ordenses.
