· O Portavoz
municipal do PP, José Luis Martínez Sanjurjo, mantivo unha reunión coa
directora xeral de Mobilidade, na que constatou o compromiso da Xunta para
concluír o proceso antes de rematar o primeiro semestre de 2015
· Os usuarios
frecuentes do transporte público entre Ordes e Santiago e A Coruña poderán
obter descontos de ata o 50% e poderán chegar a utilizar de balde as conexións
co transporte urbano das dúas cidades
· Un usuario
habitual poderá aforrar ata 1.200 euros/ano para o traxecto Ordes-Santiago e
1.400 se viaxa á Coruña; os universitarios da UDC aforrarán ata 90 euros
adicionais cada exercicio
Ordes, 13 de decembro de 2014.- O portavoz municipal do Partido Popular de Ordes, José
Luis Martínez Sanjurjo, agradece a implicación da Xunta de Galicia para
incorporar en breve a este municipio ao Plan de Transporte Metropolitano,
incorporación que implicará notables vantaxes para os usuarios habituais da
rede de transporte público que enlaza este Concello coas cidades da Coruña e
con Santiago de Compostela.
Martínez
Sanjurjo mantivo o pasado xoves unha reunión de traballo coa directora xeral de
Mobilidade da Xunta, Helena de Lucas, á que reclamou axilidade para incorporar
Ordes ao Plan de Transporte Metropolitano no prazo máis breve posible. A
directora xeral comprometeuse a axilizar o proceso de xeito que os usuarios
podan acceder definitivamente aos beneficios deste plan antes de finalizar o
primeiro semestre de 2015.
Aforros de ata 1.200 euros/ano para o traxecto
Ordes-Santiago
Unha
vez implantado, o Plan de Transporte Metropolitano permitirá que os usuarios
habituais do transporte público entre Ordes e Santiago de Compostela podan
viaxar por 1,25€/traxecto coa tarxeta metropolitana, cun desconto do 50%
respecto ás tarifas actuais, co beneficio adicional de poder utilizar de balde
o transporte urbano en Compostela nun prazo de 60 minutos. Un membro de familia
numerosa pagaría só 0,63€/traxecto. Con estes descontos, un usuario diario
poderá aforrar preto de 700 euros anuais, aforro que ascendería a case 1.200
euros se tamén é usuario do transporte urbano.
Ata 1.400€ de aforro anual para o traxecto Ordes-A
Coruña
Para
os usuarios habituais do transporte público entre Ordes e A Coruña e viceversa,
o custe do billete quedaría reducido a 2,2€ coa tarxeta metropolitana, o que
significa un aforro de 800 euros anuais, que ascendería ata os 1.400 euros/ano
no caso de que tamén utilice o bus urbano. Un estudante da UDC, con axudas para
o transporte, aforraría outros 90 euros adicionais. Un membro dunha familia numerosa podería viaxar por 1,1 €/traxecto.
En
opinión de Martínez Sanjurjo, “as vantaxes da incorporación de Ordes ao Plan de
Transporte Metropolitano que financia a Xunta no 80% son máis que evidentes e
constitúen unha nova mostra da aposta do Goberno de Feijóo polas políticas
sociais e o apoio ás familias malia as dificultades económicas do momento”.
O
portavoz municipal do PP agarda que ao estender a Ordes o Plan de Transporte
metropolitano mellore tamén a calidade do transporte interurbano que conecta a
Vila con Santiago e a Coruña, na medida en que o agardado incremento da demanda
pode implicar un aumento das frecuencias dispoñibles.