- O Concello quere enganar aos veciños e minimizou deliberadamente a suba deste ano para tratar de evitar efectos colaterais nas vindeiras municipais
- A revisión da ponencia de valores, impulsada por Regos, supón unha subida media do 53% no valor catastral dos inmobles, que nalgún caso concreto chega ao 100%
Ordes, 25 de outubro de 2014.- Os recibos do IBI para os veciños de Ordes medrarán unha media anual do 10%
(variación do valor catastral 2013 ao valor catastral 2014) entre 2015 e 2023
como consecuencia da aplicación da ponencia de valores impulsada polo alcalde,
Manuel Regos, no actual mandato, logo de terse acollido a un crédito do plan de
pago a provedores de 2,8 millóns de euros para saldar facturas impagadas. O
feito de que esta suba non se reflicta de un xeito significativo en moitos dos
recibos que os propietarios están a recibir estes días obedece a unha manobra
impulsada por Regos e Marín, co apoio do PSOE, para enganar aos veciños co obxecto
de tratar de minimizar a previsible erosión electoral que a medida pode provocar
sobre os resultados de UXO nos comicios municipais previstos para a primavera
de 2015.
É dicir, o
Concello trata de minimizar a suba deste ano, trasladándoa aos recibos que se
emitirán nos nove anos posteriores ás vindeiras municipais.
Subas de entre o 53% e o 100% no valor catastral
O Partido Popular
de Ordes recorda que a subida do IBI que se comezará a percibir na base liquidable
dos recibos aboados en este ano 2014 é consecuencia da ponencia de valores
impulsada por Regos, e que supuxo un incremento medio do 53% nos valores
catastrais dos inmobles do Municipio de Ordes, suba que nalgúns casos acada o
100% nos dez anos de aplicación da medida. As maiores subidas afectan ás
vivendas novas, suba que resulta especialmente gravosa para os seus titulares –xeralmente
mozos- porque aínda están a pagar unha hipoteca
á que se lle suma o incremento do IBI.
Todo iso a maiores de ter incrementado o tipo de gravame
dun 0,40%, o aplicado no ano 2006, ata o 0,60% do presente ano 2014.
Recursos que dan a razón aos veciños
Apunta tamén o PP
que a maior parte dos recursos de reposición presentados fai un ano están a ser
resoltos a favor dos contribuíntes total ou parcialmente, dados os numerosos
erros detectados, e que abranguen desde superficies erróneas ata datos
incorrectos na antigüidade, estado de conservación, tipoloxía construtiva, ou
mesmo presupoñían de un xeito equivocado o uso de un determinado local. Estes
erros supoñían ata un incremento do 30% no importe do recibo.
Por iso, o PP
anima aos contribuíntes con recursos resoltos ao seu favor que revisen o recibo
do IBI 2014, xa que os recursos resoltos con data posterior ao 1 de xaneiro de
2014 non foron contemplados aínda nas liquidacións. Con todo, estes
contribuíntes teñen dereito a que se lles devolva o importe cobrado
indebidamente. A reclamación pode ser presentada nas oficinas municipais.
Os contribuíntes
que observen erros nos datos catastrais dos seus bens aínda están a tempo de
presentar un recurso extraordinario de revisión ou iniciar un expediente de
subsanación de discrepancias ante a xerencia rexional do Catastro para
regularizar a situación.