· O PP local
formulará un rogo no vindeiro Pleno para instar ao Concello a mellorar a
atención aos usuarios para evitar demoras deste tipo
Ordes, 17 de setembro de 2014.- As persoas
interesadas en participar nos cursos de natación programados na piscina
municipal climatizada de Ordes tiveron que agardar este luns longos tempos de
espera para inscribirse, dada a pésima organización establecida polo Concello,
o que se traduciu en múltiples queixas por parte dos afectados, na súa maioría
pais e nais de nenos e nenas.
A
inscrición para os cursos do derradeiro trimestre deste ano, efectuada este
luns nas instalacións da piscina municipal das Casillas, acumulou tal demora
que moitas das persoas afectadas tiveron que agardar ata dúas horas, nunha cola
exterior e baixo as inclemencias meteorolóxicas. Con todo, non é a primeira vez
que se produce esta situación por mor da falta de previsión e a nula capacidade
de organización do Concello de Ordes, que xestiona directamente o recinto e,
polo tanto, podería ter reforzado a atención ao público con persoal municipal.
O
Partido Popular, que recibiu numerosas queixas dos usuarios, formulará un rogo
no vindeiro Pleno municipal para instar ao Concello de Ordes a reconducir a
situación de maneira que non volvan repetirse feitos deste tipo e se mellore a
atención aos usuarios, reforzando a atención ao público na data na que se abra
o prazo de inscrición para as actividades programadas.