- Aínda que o Pleno aprobou unanimemente en xuño, por proposta do PP, unha moción con medidas para superar as carencias actuais, o Concello nada fixo desde entón
- O PP local tamén trasladou ao Pleno desta semana as deficiencias das baldosas das beirarrúas da rúa Mediodía, que provocaron a caída, e lesións, a unha persoa en datas recentes, e as deficiencias que presenta a iluminación na Avenida Alfonso Senra
Ordes, 2 de agosto de 2014.- O Partido Popular de Ordes esixe ao
Concello que materialice, antes das festas patronais do 15 de agosto, a moción
aprobada unanimemente no Pleno municipal de xuño, por proposta do PP, para arranxar
as deficiencias que presentan as escasas áreas de estacionamento dispoñibles na
vila -cheas de fochancas, con problemas
de aceso e parcialmente invadidas pola maleza nalgún caso- , ademais de
habilitar novas áreas de aparcamento.
Dado que a moción
fixaba como horizonte temporal o 15 de agosto e que transcorrido máis dun mes
desde a súa aprobación o Concello de Ordes nada fixo para impulsar a súa
materialización, o PP local insiste na necesidade de retomar este acordo que
non só beneficiaría aos veciños, senón tamén aos visitantes e, polo tanto, ao
conxunto do comercio e a hostalería da vila. O Grupo Municipal do Partido
Popular formulou un rogo neste sentido no Pleno ordinario celebrado o pasado
xoves, nun novo intento de forzar ao executivo local a que materialice os
compromisos adquiridos.
Beirarrúas en mal estado
No mesmo Pleno, o
PP presentou outro rogo para reclamar ao Concello que arranxe os desperfectos
que presentan as baldosas das beirarrúas da Rúa Mediodía, onde hai dúas semanas
unha veciña sufriu unha caída, na que resultou lesionada, por mor do mal estado do firme. Pide tamén o
PP que o Concello revise a totalidade das beirarrúas da vila, dado o mal estado
de moitos tramos utilizados a cotío polos veciños.
No mesmo pleno, o
PP de Ordes reclamou tamén unha revisión e reparación integral dos puntos de
alumeado público da Avenida Alfonso Senra, e noutras rúas do núcleo urbano de
Ordes cunha dobre finalidade: mellorar a iluminación nocturna, e evitar
desgrazas persoais derivadas de posibles desprendemos derivados do mal estado
dos farois.
