- Malia que o Concello aboou en 2013 unha factura por máis de 25.000 euros, sen licitación nin recepción dos traballos, os servizos municipais instalaron onte pola tarde 75 butacas no local cultural do Mesón do Vento horas antes de que o PP preguntase de novo polas irregularidades no Pleno municipal
Ordes, 1 de agosto de 2014.- Novas evidencias da xestión irregular do Concello de
Ordes, que malia ter aboado no ano 2013 unha factura de 25.410 euros en concepto de “1 ud. Equipamento e mellora
dos locais culturais do Mesón do Vento”, sen que ata o de agora existise constancia
material da execución de tales traballos, como deixou en evidencia o
interventor municipal na relación de reparos que acompañan a Conta Xeral de
2013, onte pola tarde acabou instalando un total de 75 butacas no local social
do Mesón do Vento.
O
traslado precipitado deste material produciuse horas antes da celebración do
Pleno Municipal no que o Grupo Popular volveu preguntar por esta
irregularidade, que o PP considera extremadamente grave, dado que o propio
interventor municipal advirte no seu reparo que
a factura foi aboada sen que foran fiscalizados os actos que deron orixe
ás ordes de pagamento e que na xestión dese expediente se omitiron requisitos
ou trámites esenciais.
Ao tratarse dun importe superior aos 18.000
euros, o contrato non debería ser de obra, senón que se debería ter tramitado mediante un
proceso de licitación que foi ignorado. E os feitos adquiren aínda maior
gravidade na medida en que a intervención non foi avisada para a recepción da
obra, polo que o pagamento se efectuou sen efectuar a correspondente
comprobación material de execución dos traballos encargados.
Extracto
do documento de reparos á Conta Xeral de 2013 do Concello de Ordes:
O
equipamento destes locais teríase efectuado, segundo o confesado polo equipo de
Goberno no Pleno de onte, con cargo a unha subvención da Xunta para o amoblamento de locais sociais.
Outros antecedentes
Con
ser grave e extrano, o sucedido no local social do Mesón do Vento non constitúe
un feito novidoso para o equipo que lidera o alcalde de Ordes, que xa no ano
2008 aboou facturas para o equipamento do local social da parroquia de Buscás,
equipamento que, polo de agora, continúa sen aparecer por ningures.