·
Arquetas eléctricas sen selar poñen en risco a
integridade física dos viandantes na vila
·
A mala
execución das obras, consentida polo Concello e contratadas xeralmente con empresas
“do círculo pechado” do alcalde, “atenta non só contra o patrimonio municipal,
senón que poñen en risco a integridade física dos veciños”, afirma José Luis
Martínez Sanjurjo
Ordes, 31 de maio de 2014.- Chapuza ou neglixencia. A substitución de farolas
efectuada o ano paso en diferentes rúas de Ordes ao abeiro dunha liña de axudas
da Xunta de Galicia para o aforro enerxético saldouse con múltiples arquetas
eléctricas baleiras e sen selar que supoñen un elevado risco para os peóns,
especialmente para os nenos e maiores do noso municipio, segundo denuncia o PP
local.
Ben
como consecuencia da súa xestión chapuceira, ou ben por unha neglixencia, o
Concello non ocluíu as arquetas das antigas farolas. Limitouse a tapar os
buratos con losetas mal selladas que co paso do tempo acabaron rompendo, como
sucedeu na rúa do Recreo e acredita a fotografía adxunta, tomada este mesmo
sábado.
A
maiores, o Partido Popular denuncia o deficiente estado de conservación que
presentan a maior parte das beirarrúas da vila de Ordes, con losetas mal
colocadas ou soltas que co paso do tempo acaban escachando, co conseguinte
risco para os usuarios da vía pública. Na zona de Vista Alegre (fotografía
adxunta) poden apreciarse as consecuencias da pésima execución dos traballos executados
por encargo do Concello. Chama a atención que as losetas orixinais presentan
moito mellor estado de conservación que as novas.
O alcalde alenta as chapuzas
A
mala execución das obras, consentida polo Concello e contratadas xeralmente con
empresas “do círculo pechado” do alcalde, “atenta non só contra o patrimonio
municipal, senón que poñen en risco a integridade física dos veciños”,
argumenta José Luis Martínez Sanjurjo, portavoz municipal do Partido Popular de
Ordes. O voceiro popular desvela que no Concello se acumulan reclamacións
patrimoniais de usuarios por danos nos seus vehículos como consecuencia do
pésimo estado de conservación da maior parte da
rede viaria municipal e agora cabe a posibilidade de que as fochancas
nas beirarrúas provoquen lesións aos veciños, o que xeraría novas demandas.
O
Partido Popular reclamará a vindeira semana o proxecto de substitución de
farolas executado en Ordes para comprobar que solución contemplaba para as arquetas dos anteriores puntos de luz. Con
todo, considera que o sucedido é responsabilidade directa do alcalde e do seu
concelleiro de obras, ben por consentir e alentar unha execución neglixente das
obras, ben por non contemplar unha solución que evitase riscos como os que
padecen agora o os usuarios das rúas que presentan arquetas baleiras e sen
selar.