- O
alcalde segue fuxindo dos problemas e parapétase na vicealcaldesa para
evitar dar explicacións ante o Pleno
- No
pleno deste mércores, o Goberno local rexeitou con arrogancia os rogos
formulados polo PP para atender demandas longamente agardadas,
argumentando que as atenderán cando lles pete, malia recoñecer as
carencias trasladadas polo Grupo Popular
- Ao
rexedor moléstanlle os veciños, e moléstalle tamén que o PP actúe como
altofalante dos homes e mulleres de Ordes
Ordes, 29 de maio de 2014.- O grupo de Goberno de Ordes deu
resposta onte, cunha chulería inadmisible para os cargos públicos, a parte dos
rogos formulados polo PP para arranxar algunha das diferentes carencias que os
veciños veñen demandando deste hai meses ante a indiferenza municipal.
Facéndose eco das demandas que
lle trasladan os veciños a cotío, o Grupo Municipal do PP aproveitou o Pleno
ordinario de maio para reclamar que o Concello atenda necesidades como o
desbrozamento das pistas da rede de camiños de concentración parcelaria
(axúntase foto da pista de Trillán, en Buscás), o arranxo de fochancas en diferentes puntos da rede viaria municipal
e a substitución dun espello convexo de tráfico en A Canle (Buscás) que xa non
cumpre a súa función polo deterioro que presenta.
Problemas de
seguridade nunha ponte sobre o Lengüelle
O grupo que lidera José Luis
Martínez Sanjurjo reclamou tamén que o Concello de Ordes arranxe a “Ponte de
Raña” sobre o río Lengüelle, en Montaos, moi deteriorada e con riscos para a
seguridade dos seus usuarios; que amplíe a capacidade da marquesiña que
utilizan os nenos de Vilagudín (Lesta) para agardar o transporte escolar; que
se conecte a aldea de Vilagudín á rede de abastecemento de Tordoia (situada a
400 metros), previo acordo co Concello veciño; e que se arranxen os
desperfectos que presentan as beirarrúas da rúa Campeiras, no núcleo urbano de
Ordes.
Fronte ás demandas trasladadas
polo PP, a tenente de alcalde respondeu en moitos dos casos cunha arrogancia
impropia dun responsable público que ten entre as súas obrigas a de atender as
necesidades dos cidadáns, argumentando baixo o pretexto da “toma en
consideración”, que as obras reclamadas se farán só se o Goberno local o estima
oportuno, “cando o decida o Goberno”.
Para o Partido Popular, o tono e
as respostas ofrecidas pola voceira do equipo de Goberno de Ordes poñen de
manifesto a súa incompetencia, por non terse corrixido a tempo unhas carencias
das que xa tiñan coñecemento; pero tamén unha “inmensa soberbia”, demostrando
que lles molesta que o PP se convirta en altofalante dos veciños.
Un alcalde que
fuxe dos veciños
En opinión do portavoz municipal
do PP de Ordes, José Luis Martínez Sanjurjo, o silencio do alcalde, que volveu
agocharse en lugar de responder ás necesidades dos veciños, acredita de novo a
“covardía política dun rexedor que se parapeta na hipocresía de Silvia Marín
por carecer de argumentos que ofrecer a uns veciños que están fartos de evasivas”.
