· O PP insta ao Concello a revisar e
arranxar toda a sinalización horizontal da vila
Ordes, 21 de abril de 2014.- A falta de mantemento da sinalización
horizontal (pasos de peóns e bordos, fundamentalmente) da vila de Ordes, sen
repintar na súa maior parte desde hai varios anos, supón un serio risco para a
seguridade de peóns e viandantes, xa que nalgúns puntos difícilmente se
visualizan as marcas no firme, especialmente cando o chan está mollado ou pola
noite.
Para paliar esta situación, o
Partido Popular de Ordes defenderá no Pleno desta semana unha moción para
instar ao Goberno local a revisar toda a sinalización horizontal da vila,
reparando e repintando todos os elementos que o necesiten, que son maioría,
logo de anos de desatención por parte dos servizos municipais.
“Desde o PP local pensamos que
chegou o momento de arranxar estas carencias: porque o estado dos pasos de
peóns non permite demorar máis tempo a súa reparación, e porque superado o
inverno, os traballos poden desenvolverse con maiores garantías”, afirma José
Luis Martínez Sanjurjo, portavoz do Grupo Municipal Popular.
“Sabemos que cando os veciños se
queixan do estado de abandono que presentan os equipamentos públicos de Ordes,
desde o Concello se argumenta a carencia de recursos, pero non é menos certo
que se están investindo cartos en actuacións pouco ou nada necesarias, mentres
que intervencións esenciais, como as que afectan á seguridade das persoas foron
adiadas indefinidamente nun exercicio de irresponsabilidade difícil de
superar”, conclúe Martínez Sanjurjo.