· A infraestrutura estivo fóra de servizo
todo o tempo porque o Concello se “esqueceu” de mercar os terreos necesarios
para conectar o depósito á rede de abastecemento
Ordes, 25 de marzo de 2014.-
O Concello de Ordes tardou catro anos, desde o remate das obras, en
poñer en servizo o novo depósito de auga potable de Merelle, por unha mala
planificación municipal, xa que o proxecto foi executado sen dispoñer dos
terreos necesarios para conectar a instalación da rede de distribución.
O feito de que o Concello de
Ordes se esquecese, no seu momento, de adquirir os terreos necesarios para
efectuar a conexión, traduciuse en catro anos de carencias para os veciños. A
insuficiente capacidade de almacenamento dos antigos depósitos de auga potable
veu provocando, ata o de agora, problemas tanto no inverno (augas turbias nas
billas como consecuencias das enchentes)
como no verán, ao descender o caudal do río do que se abastece a capital
municipal.
A desidia do Concello de Ordes á
hora de poñer en servizo o novo depósito de auga potable, deseñado para dar
servizo ao conxunto da vila, contrasta coa rapidez coa que o Goberno local actuou
executando outras actuacións como os baixos da Alameda ou o novo edificio do
Concello, que ningún veciño demandou e supuxeron a dilapidación dun enorme
volume de recursos públicos.
Reunións cos veciños
Por outra parte, o Partido Popular
de Ordes continúa a rolda de reunións cos veciños das diferentes parroquias do
municipio. As próximas están previstas en Beán (venres 28 de marzo ás 21,30
horas na antiga casa reitoral) e en Barbeiros (domingo 30 ás 12,00 horas no
local social da escola do Cruceiro).
