- O
portavoz municipal do Partido Popular defendeu no Pleno deste xoves unha moción para instar ao Concello a
publicar na web municipal todos os contratos municipais, e que
lamentablemente non foi aceptada pola corporación
- “Non
imos darlle un voto de confianza nin unha patente de curso, porque os
veciños están fartos da súa prepotencia -díxolle ao alcalde-, da súa estratexia
de ocultación e engano; e da súa
forma de xestionar os recursos públicos”, afirmou Martínez Sanjurjo
Ordes, 28 de febreiro de 2014.- “Alcalde e a vicealcaldesa de Ordes son escravos da
declaración da tenente de alcalde e deben
responder por ela. Lamentablemente, xa están a responder ante a Xustiza,
pero deben facelo tamén ante esta
Corporación e ante os veciños”. Así o afirmou o portavoz municipal do Partido
Popular de Ordes, José Luis Martínez, no pleno celebrado na noite deste xoves,
no que defendeu unha moción encamiñada a transparentar a xestión municipal,
mediante a publicación, na web do Concello, de todos os contratos da
administración local; a cal non foi aceptada pola corporación, feito que
lamenta e que é unha nova mostra do proceder dun goberno que prefire traballar
na sombra, sempre de costas á realidade que demanda a inmensa maioría da
cidadanía.
Malia
as manobras encamiñadas a tratar de desvincular ao rexedor das presuntas irregularidades investigadas no
Concello de Ordes, Martínez Sanjurjo amósase convencido de que “o alcalde é
igual de responsable de canto ten sucedido neste Concello, porque é o artífice dunha
rede clientelar montada en Ordes desde que accedeu á Alcaldía”.
Nin voto de confianza, nin patente de corso
O
portavoz popular deixou claro que se ben, en ningún caso pretenden suplantar á actuación
da Xustiza, “non imos darlle un voto de confianza nin unha patente de curso,
porque moitos veciños están fartos da súa prepotencia -dixo, dirixíndose ao
alcalde-, da súa estratexia de ocultación e engano; e da súa forma de xestionar
os recursos públicos”.
Falta de respecto aos veciños
Da
declaración xudicial atribuída á tenente de alcaldesa e publicada en datas
recentes nos medios de comunicación, o portavoz popular cuestionou que sinalase
que “a veces digo que en este país aún no hay crisis suficiente (...) a
veces te veías y deseabas para encontrar a alguien”. Ante esta afirmación,
o voceiro popular preguntou como unha persoa responsable pode dicir tal cousa
nun concello coma Ordes, con familias enteiras e centos de persoas angustiadas
por carecer dun posto de traballo.
Respecto
á declaración na que afirmou que na política local “no te sacas al vecino de
encima”, Martínez Sanjurjo apuntou que a tenente de alcaldesa “recoñeceu explicitamente
o que xa sospeitabamos: que lle molestan os veciños e que só lle interesan á
hora de pedírllelo voto”.
Antes
de concluír a súa intervención, o voceiro municipal dos populares ordenses
instou á tenente de alcaldesa a recoñecer os seus erros, pedir desculpas aos
veciños, e que sopese presentar a súa dimisión por corresponsabilidade ética co
seu cargo.
Pista de Morgade
Tamén
no pleno de este xoves, o concelleiro popular José Manuel Gestal defendeu unha
moción que contou co respaldo unánime da corporación, en virtude do cal se
acordou un arranxo urxente dos desperfectos na pista que comunica o Mesón do
Vento con Morgade, e a redacción dun proxecto de obras para a posterior
inclusión da mesma nun plan de obras que contemple a súa mellora e ampliación.