·
Os populares tamén tratarán de incluír nesta subvención
un arranxo na rede de pluviais do núcleo urbano e a construción dun aparcadoiro
no igrexario de Vilamaior
·
Noutra moción, o PP reclamará unha intervención de
urxencia na pista que enlaza Mesón do Vento con Morgade, que ademais dunha
notable deterioración, está invadida por árbores e maleza no seu tramo inicial
Ordes, 26 de
febreiro de 2014.- O Grupo Municipal do
Partido Popular de Ordes proporá financiar, con cargo do Plan DTC 93 da Deputación
da Coruña –dotado con 246.932,49€ para este Concello en 2014- o arranxo do pavillón polideportivo do CEIP
Campomaior, reparar a rede de pluviais no entronque da rúa da Canteira coa rúa
de Mercado, no núcleo urbano e a construción dun aparcadoiro nas inmediacións
da igrexa de Santiago de Vilamaior.
O
pavillón polideportivo de Campomaior, de titularidade municipal, foi executado
en diferentes fases a partir dunha pista descuberta creada a mediados dos anos
80. En datas posteriores foi cuberto e dotado de peche perimetral; nas últimas
obras (arredor do ano 2004) foi dotado de vestiarios e un pequeno graderío
lateral.
Fóra
do horario escolar, o recinto adoita ser utilizado para a práctica deportiva e
o adestramento en diferentes disciplinas como o fútbol-sala, baloncesto, xoquei
a patíns, patinaxe ou tenis. Tamén se ten empregado para o desenvolvemento de xornadas
deportivas, exhibicións ou demostracións de todo tipo con notable afluencia de
público.
O
tempo transcorrido desde as últimas intervencións neste recinto deportivo de
usos múltiples, a deterioración derivada do uso intensivo e as novas
necesidades xurdidas co paso do tempo fan necesaria una intervención integral
que o Partido Popular considera debería consistir nos seguintes traballos:
-
Substitución da actual cuberta e da parte superior dos laterais de chapa
metálica por outra que garanta un óptimo illamento de humidades e térmico, e
que, ao tempo, permita a iluminación natural, para mellorar a luminosidade
interior e permitir un maior aforro enerxético.
-
Dotar os paramentos verticais de cámaras e elementos que actúen de illantes
térmicos e permitan mellorar a acústica do recinto.
-
Colocar un novo piso sobre a actual pista de formigón que se adapte ás
actividades deportivas a desenvolver, incluíndo a práctica da ximnasia polos
alumnos do CEIP Campomaior.
-
Melloras nos vestiarios e nos aseos existentes.
Pista de Morgade
Tamén no pleno deste xoves, o
concelleiro popular José Manuel Gestal defenderá unha moción para instar ao
Concello de Ordes a programar unha intervención de urxencia na pista que enlaza
Mesón do Vento con Morgade, na parroquia de Ardemil.
Este vial, de preto de 900 metros, presenta unha notable
deterioración en todo o seu trazado, con fochancas, deformación na capa de
rodadura, ausencia de cunetas e maleza invasora que inutiliza parte dun firme
que non supera os catro metros de anchura en ningún punto.
A maiores, no tramo inicial da
pista, preto do Mesón do Vento, as polas das árbores situadas nas marxes
dificultan a circulación de vehículos voluminosos, ao tempo que as raíces aceleran
os estragos no firme.
Para corrixir esta situación,
o Partido Popular propón que o Concello acometa un rebacheo inmediato da pista,
desbroce e proceda coa apertura das cunetas, e efectúe as necesarias tarefas de
poda no tramo inicial para eliminar os elementos vexetais que dificultan a
circulación e limitan a visibilidade e, por conseguinte, a seguridade.
Xa a medio prazo, os populares
de Ordes instan ao Concello a realizar unha memoria técnica para cuantificar o
presuposto das obras de ampliación desta pista, co obxectivo de incluír o seu
financiamento nos vindeiros orzamentos municipais, ou con cargo aos POS 2015 da
Deputación da Coruña.
