·
O Partido Popular propón destinar o importe do contrato
ao mantemento dos tractores municipais para poder desbrozar a totalidade da
rede viaria municipal cada ano
Ordes, 15 de xaneiro de 2014.- Os dous tractores de titularidade municipal, equipados
con cadansúa desbrozadora, levan varios anos fóra de servizo e estacionados
nunha nave particular, mentres que o Concello de Ordes opta por externalizar as
tarefas de limpeza de cunetas, adxudicando os traballos a unha empresa privada.
Esta
situación provoca que moitos tramos da rede viaria municipal, especialmente as
pistas de concentración parcelaria, queden sen desbrozar, co conseguinte
deterioro e o incremento do risco de propagación de incendios na época estival.
Para
poñer fin a esta situación, o Partido Popular proporá nun próximo Pleno que o
Concello reoriente o destino final dos 120.000 euros que dedica cada ano a
contratar cunha empresa privada o desbroce de cunetas.
Desbrozar con recursos propios
Entende
o Partido Popular que destinando eses 120.000 euros anuais ao mantemento dos
tractores municipais e operando esas máquinas con traballadores do Concello se
podería multiplicar a superficie desbrozada durante cada exercicio.
“Dous
tractores traballando todo o ano poderían manter perfectamente limpas todas as
pistas do Concello de Ordes, a diferenza do que acontece a día de hoxe, no que
atopamos camiños practicamente intransitables, tanto polo mal estado do firme,
como polo falta de limpeza das súas marxes”, afirma José Luis Martínez
Sanjurjo, portavoz munipal do Partido Popular de Ordes.
