·
Bens situados na mesma rúa da vila e con idéntico
aproveitamento urbanístico reciben un trato diferenciado na ponencia de valores
impulsada polo Concello para subir o IBI
·
O PP tamén denuncia casos de incrementos do IBI
superiores ao 100% para veciños que acaban de construír ou adquirir a súa
primeira vivenda e teñen que facer fronte a hipotecas de máis de 30 anos
·
Martínez Sanjurjo afirma que as propostas do alcalde
“ofenden a intelixencia dos veciños”
Ordes, 14 de novembro de 2013.- O Grupo Partido Popular de Ordes votou hoxe en contra da
modificación das ordenanzas fiscais municipais para o ano 2014 por entender que
a proposta trasladada polo Alcalde ao Pleno extraordinario celebrado esta mañá
“ofende á intelixencia dos veciños”, en palabras de Martínez Sanjurjo, na
medida en que trata de ocultar unha subida xeneralizada dos tributos de maior
recadación, con conxelacións e reducións que o Goberno local nin sequera é
capaz de cuantificar.
O
portavoz municipal do PP, José Luis Martínez Sanjurjo, denunciou que a política
fiscal do Concello de Ordes é discriminatoria, e puxo como exemplo que a
ponencia de valores que serve de base para a subida do Imposto de Bens Inmobles
(IBI) e o novo texto da ordenanza fiscal número 1, acordos de notificacións de
valores xirados a tódolos obrigados tributarios logo da decisión impulsada
unilateralmente polo Concello, e que trata de maneira diferente a bens situados
na mesma rúa da vila e con idéntico aproveitamento urbanístico. É dicir, bens
de idénticas características pagarán impostos diferentes por unha incorrecta
revisión e planificación municipal dos traballos técnicos, e que en
consecuencia converte a ponencia en totalmente arbitraria.
Subas do 100% para hipotecados a máis de 30 anos
E
denunciou tamén o portavoz popular que se ben a media dos recibos do IBI subirán
un 53% en 10 anos (2014-2023), existen contribuíntes que deberán facer fronte a
subidas no mesmo período superiores ao 100%.
Os afectados son, na maior parte de estes casos, veciños que acaban de
construír ou adquirir as súas primeiras vivendas e que ademais deben facer
fronte a hipotecas de máis de 30 anos, co que a subida do IBI supón unha
penalización adicional dificilmente soportable.
Na
súa intervención durante o Pleno extraordinario, convocado para as 08,30 horas
deste xoves, o portavoz municipal do PP enumerou tamén a longa nómina de erros
detectados na nova ponencia de valores, que acumula xa mais de 800 reclamacións
ou recursos de reposición, ademais das 160 notificacións erróneas enviadas e
finalmente corrixidas.
Martínez
Sanjurjo enmarcou estes erros no desleixo do alcalde, que “non le o que asina”,
como quedou de manifesto entre a proposta inicial e a definitiva de
modificación das ordenanzas fiscais remitidas aos grupos políticos municipais, e
que contemplaba unha suba do 15,4% no Imposto sobre Construcións, Instalacións
e Obras (ICIO), subida que foi anulada tras a denuncia en comisión do PP e que
o Concello achacou a un erro.
Apunta
tamén o PP que a taxa por recollida de lixo subirá en 2014 un 5,3% (2,4 puntos
por riba do IPC) e afectará a máis do 95% dos bens inmobles do Concello.
José
Luis Martínez Sanjurjo atribúe a subida de impostos impulsada por Regos ao
delicado estado das arcas públicas municipais, lastradas por unha débeda a longo prazo de 5 millóns de
euros, aos que se suma dende xuño de 2012 o crédito de 2,8 millóns de euros
correspondente ao Plan de Pago a Provedores.
Martínez
Sanjurjo tamén cuestionou as trabas do alcalde á hora de incluír bonificacións
no IBI para a totalidade das explotacións agrarias, ou a negativa a buscar o xeito de bonificar o IBI
das vivendas titularidade de persoas con discapacidade.
“Desde o Partido popular nada temos que obxectar a
que se libre do imposto de circulación aos vehículos con máis de 25 anos ou se
conxelen os tipos en varias das ordenanzas fiscais, pero pareceríanos mellor e
moito máis xusto que se bonificase o IBI das explotacións agrarias, das
vivendas nas que residen persoas con discapacidade, ou as que non contan con
servizos municipais adecuados; e en especial que se tratase a todos os
contribuíntes por igual, sen discriminación algunha”, afirmou Martínez
Sanjurjo.
O portavoz popular rematou a súa intervención
reclamando do Concello “equidade para todos, concepto que vostedes non
comprenden, non entenden porque, quizais, non lles interesa”.
