·
A Alcaldía trasladou á Comisión de
Contas e Facenda unha proposta repleta de trabas e encamiñada a que só unha de
cada dez explotacións agropecuarias se poda acoller ás bonificacións do 95% do
IBI
·
No pleno ordinario do pasado xoves
anunciou a súa particular negativa a que dita bonificación poida ser efectiva
·
O alcalde tamén trata de minorar as
propostas de bonificacións no IBI para familias numerosas e non recolle a
solicitada para persoas con discapacidade
Ordes, 2 de
novembro de 2013.- A proposta da Alcaldía de Ordes encamiñada a
regular a ordenanza fiscal para a bonificación do IBI presentada o pasado 25 de
outubro na Comisión de Contas e Facenda, logo de que o Pleno ordinario de
setembro acordase impulsar esa bonificación por unanimidade, trata de boicotear
o acordo inicial e unánime da Corporación na medida en que está repleto de
trabas para evitar que boa parte dos potenciais beneficiarios poidan acollerse
a esta rebaixa fiscal.
O Partido Popular de Ordes
denuncia que na Comisión informativa de Contas e Facenda, o grupo político de
Goberno local (UXO) non presentou proposta algunha para minimizar a subida do
IBI, mentres que o informe da Alcaldía, en lugar de aportar solucións
satisfactorias, complica aínda máis a situación, con esixencias burocráticas de
difícil ou imposible cumprimento para os potenciais solicitantes.
O alcalde
pretende excluír o 90% dos solicitantes
De aplicarse definitivamente a
proposta inicial do alcalde, estímase que só unha de cada dez explotacións
agropecuarias se poderían acoller á bonificación do 95% do IBI no valor das
construcións agrarias, mentres que todas as restantes pasarían a ter unha carga
fiscal inasumible nun prazo máximo de dez anos.
Pero, o verdadeiramente certo é
que o goberno local busca non aplicar bonificación algunha as construcións
propias das explotacións agrarias, como quedou de manifesto no anuncio feito
polo propio Regos nunha intervención no pleno ordinario do pasado xoves.
O Partido Popular cuestiona
tamén a falta de criterio dos concelleiros do PSOE e de CidG, que no Pleno de
xuño apoiaron a subida do IBI a aplicar a nova ponencia de valores, proposta
polo equipo de Goberno para o ano 2014; e agora, a sabendas de que dita subida
xa é irreversible para dito exercicio, propuxeron conxelar ou rebaixar o tipo
de gravame fixado nun 0,60%.
A subida do IBI impulsada polo
alcalde de Ordes para facer fronte á débeda millonaria acumulada polo Concello
durante estes seis últimos anos de mandato fará que nos próximos dez anos os
recibos do IBI suban unha media do 53% como consecuencia da aplicación da nova
ponencia de valores; todo iso a maiores de ter incrementado o tipo de gravame
dun 0,40%, o aplicado no ano 2006, ata o 0,6171% do presente ano 2013.
As trabas da Alcaldía afectan
tamén á proposta do Grupo Popular para establecer bonificacións do IBI para as
vivendas de familias numerosas ou das que sexan titulares persoas con
discapacidade; e en ningún caso contemplan bonificar as vivendas do rural que
carecen de servizos axeitados (accesos, abastecemento, saneamento, ...)
