·
No Pleno de onte, e respondendo a unha pregunta do PP, o
alcalde recoñeceu a concesión da axuda, xestionada polo PSOE como parte do
apoio aos orzamentos 2013, ao tempo que o Concello segue “sableando” aos
veciños coa subida do IBI
·
O Pleno admite o texto da moción do PP para aplicar
bonificacións e exencións no IBI, propostas que o PP tratará de axilizar en comisión
informativa para que sexan aprobadas no vindeiro pleno ordinario de outubro
Ordes, 27 de setembro de 2013.- O Concello de Ordes concedeu unha axuda de 10.000 euros para
a celebración dun festival rock no campo da feira da vila o primeiro venres de
setembro e sen que se rexistrase afluencia algunha de público. O alcalde
recoñeceu a concesión desta axuda no Pleno de onte ao responder a unha pregunta
formulada polo Grupo Municipal do PP.
José
Luis Martínez, portavoz municipal do PP, recorda que esta axuda forma parte dos
compromisos adquiridos polo alcalde co único concelleiro do PSOE local para
acadar o seu apoio nos orzamentos 2013. “¿É deste xeito como pretenden UXO e o
PSOE axudar aos veciños de Ordes, tirando cartos en iniciativas que ninguén
demanda, mentres o Concello sablea aos veciños coa subida do IBI e se
desentende das súas verdadeiras obrigas?”, pregunta Martínez Sanjurjo.
Non hai cartos para arranxar os pasos de peóns
Este
novo episodio de derroche dos cartos públicos contrasta coa deixadez do
Concello respecto a equipamentos que necesitan unha urxente reparación, como
sucede coa maior parte dos pasos de peóns da vila, que necesitan dunha revisión
e repintado antes do inverno, dado o seu mal estado de conservación. Mentres o
Concello destinou 10.000 euros a un festival sen público, tamén no Pleno de
onte, o equipo de Goberno rexeitou unha proposta do PP para arranxar de
inmediato os pasos de peóns argumentando que carece de recursos e que esta
actuación deberá ser aprazada para máis adiante.
Bonificacións e exencións do IBI
O PP
de Ordes adianta que urxirá a aplicación das bonificacións e exencións do IBI
para o exercicio 2014, que onte defendeu a través dunha moción que resultou aceptada
no Pleno e que agora deberá pasar por comisión informativa antes da aprobación
definitiva da reforma fiscal na vindeira sesión plenaria do mes de outubro.
A
moción do PP promove a modificación da ordenanza fiscal de cara a reducir o
importe dos recibos do IBI no 2014 e exercicios seguintes, para tódalas edificacións
de explotacións agrarias, das vivendas propiedade de discapacitados e de
familias numerosas; así como a exención para os bens propios das entidades sen
ánimo de lucro. Sen contar coas notificacións erróneas do ano 2013 enviadas en
datas recentes, a recente ponencia de valores e o tipo de gravame aprobado por
UXO e PSOE no pleno do pasado mes de xuño, fará que o IBI medre un 53% de media
en 10 anos. E a moción do PP busca minimizar o impacto da suba, dentro da
normativa legal vixente.
