·
Defenderá unha moción no vindeiro Pleno
para instar ao Concello a revisar a sinalización horizontal e vertical dos
pasos de peóns, que nalgúns casos custa visualizar correctamente
·
“Mágoa que o interese que o alcalde
puxo en subir o IBI non se traduza nun esforzo similar para atender os
problemas dos veciños”, afirma José Luis Martínez
Ordes, 9 de
agosto de 2013.- O Partido Popular de Ordes, facéndose eco das
queixas plantexadas por varios veciños de diferentes rúas da vila, defenderá no
próximo Pleno municipal, unha moción para instar ao Concello a revisar a
sinalización horizontal e vertical de todos os pasos de peóns da vila, dado o
deficiente estado que presentan e que nalgúns casos se traduce en dificultades
de visualización para condutores e viandantes.
O portavoz municipal do PP de
Ordes, José Luis Martínez Sanjurjo, enmarca as deficiencias que presentan os
pasos de peóns da vila no desinterese do Goberno local respecto aos equipamentos
públicos, dado que tanto o repintado dos pasos de peóns como a revisión e
reposición da sinalización vertical implican custes perfectamente asumibles
para as arcas municipais. Cando se trata de vías das que son titulares outras
administracións, abondaría cunha notificación escrita.
Un alcalde que
non se entera ou non quere enterarse
“Lamentablemente, o equipo de
Goberno de Ordes, comezando polo alcalde, leva todo o mandato nos despachos
escapando da realidade, de costas aos veciños e ás súas verdadeiras necesidades,
polo que non nos sorprende que non se enteren ou non queiran enterarse do que
pasa. É unha mágoa que o interese que o alcalde e o seu equipo puxeron en subir a recadación do IBI para
os vindeiros 10 anos, e con atrasos incluídos nas revisións efectuadas no ano
2012, non se traduza nun esforzo similar á hora de atender os problemas e
necesidades dos contribuíntes”, afirma José Luis Martínez.
