- O Concello esqueceuse de adquirir os terreos necesarios para conectar o depósito á rede, o que impide a entrada en servizo do novo equipamento que custou preto de 200.000 euros
Ordes, 11 de maio de 2013.- Preto de tres anos despois de rematar as obras de construción
do novo depósito de auga potable que debería prestar servizo a Ordes, este
equipamento, ubicado no lugar de Merelle, preto da N-550, continúa sen entrar
en funcionamento por mor dunha neglixente planificación do Goberno local.
O
Concello de Ordes esqueceuse de mercar os terreos necesarios para conectar o
novo depósito á rede de captación e subministración, polo que, a día de hoxe, e
tras un investimento de 182.000 euros, o novo equipamento continúa sen uso
algún.
A
deixadez do Goberno local en relación con este asunto contrasta cos problemas no
abastecemento de auga potable que presenta Ordes en determinadas épocas do ano.
A insuficiente capacidade de almacenamento dos antigos depósitos provoca
trastornos tanto no inverno, cando as enchentes do río no que se ubica a
captación e a ETAP se traducen en augas turbias nas billas, dado que os alxibes
carecen de capacidade de almacenamento suficiente para salvar eses problemas
puntuais; como no verán, cando descende o caudal do curso fluvial.
O
Partido Popular de Ordes enmarca o sucedido co novo depósito de auga potable na
mala praxis habitual que caracteriza a planificación da maior parte das obras
emprendidas polo Concello ao longo dos últimos seis anos, dos que recorda tres
exemplos: a ampliación da Alameda presenta fendas e filtracións de augas; a
rehabilitación do antigo Concello provocou danos estruturais que obrigaron ao
seu baleirado absoluto; e as reparacións efectuadas en varias rúas da vila
presentaron desperfectos escasos meses despois de ser rematadas.
“Só a
un alcalde con acreditadas dificultades para a planificación se lle podía
ocorrer construír un depósito de auga sen ter garantida a reserva de espazo
para as tuberías de conexión”, conclúe José Luis Martínez, portavoz local do PP
de Ordes.
