·
Martínez Sanjurjo considera “indecente” a proliferación
de plenos extraordinarios convocados polo alcalde coa única finalidade de
cobrar dietas
· O alcalde multiplica a convocatoria de comisións,
baleiras de contido documental, coa única finalidade de incrementar os ingresos
dos seus concelleiros, aos que o Partido Popular e outros partidos da oposición
retiraron o soldo
·
Os populares de Ordes denuncian a actitude
antidemocrática do alcalde por convocar o pleno extraordinario de aprobación
dos presupostos en ausencia de un concelleiro
·
A presión da oposición obriga ao alcalde a retirar da
orde do día a ampliación da zona ORA a todo o centro da vila
Ordes, 6 de xullo de 2012.- Os cinco concelleiros do Partido Popular de Ordes doarán
a Cáritas o importe das dietas que perciban por asistencia ao Pleno
extraordinario convocado para esta mañá polo alcalde de Ordes.
Con
esta decisión, o Partido Popular quere expresar o seu malestar pola
proliferación de convocatorias de plenos extraordinarios (cunha indemnización
de 150 euros/concelleiro) e de comisións (105 euros/concelleiro), convocatorias
innecesarias no caso dos plenos, e case sempre baleiras de contido por falta de
documentación das comisións, que só responden ao interese do alcalde por pagar
dietas aos concelleiros do equipo de Goberno, aos que a oposición liderada polo
PP, deixou sen soldo na actual lexislatura.
Indecencia
Así, o
portavoz municipal do PP de Ordes, José Luis Martínez Sanjurjo, denuncia que
esta semana, o alcalde convocou tres comisións diferentes, baleiras de contido
documental, e que duran non máis de 10 ou 15 minutos. “É evidente –afirmou- que
esta proliferación de comisións, e mesmo o Pleno extraordinario de hoxe (o quinto
en nove meses), retratran claramente o proceder dun alcalde que non só actúa
con covardía, senón que deixa claro que prima os intereses persoais en lugar de
velar polas necesidades dos veciños que pagan impostos e sosteñen o Concello”.
“Estase
cometendo unha indecencia e quero deixar constancia da frontal oposición do
Partido Popular a este xeito de actuar, máxime nun momento no que se están a
aplicar recortes para sacar a España da crise na que nos sumiron Zapatero e os
seus cómplices, Regos entre eles, dado que o alcalde de Ordes pediu o voto para
o PSOE”, afirma Martínez Sanjurjo.
Pleno “trampa”
No
Pleno extraordinario celebrado esta mañá, o Partido Popular volveu expresar o
seu malestar pola “trampa do alcalde”, que convocou esta xuntanza ás presas
aproveitándose de que un concelleiro do Partido Popular aínda non puido tomar
posesión por non se ter recibido a corresponde acta da Xunta electoral.
O
portavoz municipal do Partido Popular recordou que se o Concello leva máis de
seis meses cos presupostos prorrogados, ben podía agardar un par de semanas
máis para tratar de sacar adiante as contas de 2012 unha vez formalizada a toma
de posesión do novo edil. Sen embargo, a verdadeira razón da convocatoria
estriba na minoría precaria coa que goberna o alcalde, incapaz de articular
apoios estables que lle garantan a gobernabilidade de Ordes, dado que UXO só
conta con 7 dos 17 edís que integran a Corporación.
O Partido
Popular tamén cuestionou con dureza que o alcalde aproveitase a convocatoria de
hoxe para aprobar unha suba xeneralizada de todos os impostos municipais,
trasladando ao peto dos veciños a débeda de máis de 10 millóns de euros que
xerou durante os cinco anos que leva no cargo.
ORA máis cara
Finalmente,
a presión exercida desde os grupos da oposición forzou ao alcalde a retirar a
da orde do día o punto que pretendía estender a zona ORA a todas as rúas do
centro da vila.
O
PPdeG felicítase pola retirada deste punto, xa que supoñía o primeiro paso
dunha estratexia encamiñada a duplicar a recadación por estacionar na zona
azul.
