- A delegada territorial da Xunta na Coruña avaliou con representantes da comunidade educativa do CEIP Campomaior as necesidades do centro
A Coruña, 4 de xullo de 2012.- A
delegada territorial da Xunta na provincia, Belén do Campo, subliñou esta tarde
o compromiso da Consellería de Cultura, Educación e Ordenación Universitaria na
mellora dos equipamentos educativos do Concello de Ordes. Así llo trasladou ao
portavoz municipal do Partido Popular e concelleiro, José Luis Martínez, á
tamén edil, Susana Mosquera, e aos representantes da comunidade educativa do
Colexio de Educación Infantil e Primaria (CEIP) Campomaior, cos que hoxe mantivo
unha reunión de traballo.
No encontro, a
directora do colexio, Mercedes Barros, e a membro da ANPA Ana Herves
trasladáronlle á representante do Goberno galego na provincia a necesidade de
levar a cabo melloras no edificio, entre as que se atoparía a creación dun
corredor cuberto no lateral do inmoble para facilitar o acceso dos alumnos e
alumnas, a dotación de aseos adaptados na área de Educación Infantil ou o
traslado da aula de informática. Pola súa banda, Do Campo comprometeuse a
estudar estas propostas e a remitilas de inmediato ao departamento autonómico
para o seu análise.
A delegada
territorial tamén amosou a súa vontade de traballar intensamente para darlles
cumprimento no menor prazo de tempo posible e beneficiar aos 360 rapaces de
Educación Infantil e Primaria que estudarán neste centro educativo o vindeiro
curso. Neste senso, Do
Campo trasladoulle tanto á comunidade educativa como aos representantes
políticos a disposición do Executivo galego de explorar todas alternativas para
acadar a mellor solución e seguir mantendo a aposta da consellería pola
calidade do sistema educativo. “A Xunta traballa para
seguir avanzando na adecuación das infraestruturas co fin de continuar
mellorando as condicións de traballo e estudo dos mestres e alumnos”, sinalou a
delegada.
