·
En lugar de ter
executado as obras durante o inverno para telas listas no verán, o Concello
agardou a xuño para derrubar todo o equipamento que dá soporte á piscina.
·
A decisión parte do
mesmo equipo de Goberno que provocou un dano irreversible á casa consistorial
que pretendía rehabilitar.
Ordes, 9 de xuño de 2012.- As obras iniciadas estes
días polo Concello de Ordes nas dependencias da piscina municipal do Campo da
Feira constitúen un “auténtico despropósito”, tendo en conta que puideron ser
efectuadas durante o inverno pasado para deixar as instalacións listas para o
seu uso ao comezo do verán, como veu sucedendo ata o de agora. Así o considera
o PP de Ordes, que enmarca esta medida na sucesión de decisións absurdas que se
empeña en adoptar o equipo de goberno local.
Riscos dunha obra apresurada
O Partido Popular
de Ordes cuestiona a decisión do equipo de Goberno na medida en que vai
implicar a execución de traballo a toda présa, co conseguinte risco de que que
xurdan deficiencias, como xa ten acontecido con outras actuacións deste tipo
acometidas na vila nos últimos meses, e que, a posteriori, poden
resultar difíciles de corrixir.
Con todo, para os
populares de Ordes non resulta sorprendente que Regos e o seu equipo de goberno
aproveiten o comezo do verán para executar as obras na piscina descuberta que,
casualmente, só está operativa durante o período estival. Non sorprende a
decisión por ter sido adoptada polo mesmo alcalde que, pretendendo acometer
unha lixeira rehabilitación da Casa Consistorial, acabou provocando un dano
estructural irreparable, con risco de derrubamento para o conxunto do edificio,
que leva preto dun ano apuntalado e pechado a cal e canto.
O alcalde das decisións absurdas
“Lamentablemente,
Regos pasará á historia non só como o alcalde que sumiu a Ordes na bancarrota
en so catro anos, cunha débeda real recoñecida de máis de 10 millóns de euros,
senón por adoptar un amplo abano de decisións absurdas e contrarias a toda
lóxica, ás que agora se suman as obras na piscina descuberta cando,
precisamente, debería estar lista para entrar en servizo”, afirma José Luis
Martínez Sanjurjo, voceiro municipal do Partido Popular de Ordes.
