- Interpreta que a designación de Martínez Sanjurjo como membro do Comité Executivo Rexional do PPdeG reforza a aposta de Feijóo por Ordes e recoñece o traballo desenvolvido no ámbito local
Ordes, 14 de maio de 2016.-
A recente designación do alcalde de Ordes, José Luis Martínez Sanjurjo,
como membro do Comité Executivo do PPdeG constitúe un motivo de satisfacción
para os populares ordenses, que interpretan esta nova como un recoñecemento ao
traballo desenvolvido polo conxunto de militantes e simpatizantes do PP local
ao longo dos últimos anos.
Os populares ordenses
interpretan tamén esta elección –celebrada no XVI Congreso do PPdeG, celebrado
en Ourense- como unha aposta e unha mostra de confianza do presidente Feijóo no
PP de Ordes e no traballo que Martínez Sanjurjo está a desenvolver á fronte do
Concello desde o pasado mes de xullo.
Pola súa parte, Martínez
Sanjurjo valora a reelección de Feijóo
como presidente do PPdeG e candidato á reelección nos vindeiros comicios
autonómicos, e contrapón a situación do
Partido Popular de Galicia coa das restantes formacións, carentes de liderato e
sumidas en loitas e descualificacións internas que semellan non ter fin.
“Como integrante da gran familia
do PPdeG podo asegurar que en Ordes estamos en disposición de traballar para
que Feijóo revalide a maioría necesaria para gobernar, porque é o único que
pode garantir a estabilidade que Galicia necesita neste momento”, afirma Martínez
Sanjurjo.
