·
Martínez
Sanjurjo reta a Regos a un debate sobre a situación real das parroquias para
que os veciños podan comprobar quen coñece de verdade as necesidades do
municipio
·
O PP
acusa a Regos de descoñecer a realidade de Ordes porque escapa dos veciños,
pero tamén porque non decide ó 100% no día a día do Concello
Ordes, 26 de decembro de 2012.- O portavoz municipal do Partido
Popular de Ordes, José Luis Martínez Sanjurjo, reitera que o alcalde goberna de
costas aos veciños, dos que só se acorda durante a campaña electoral.
Logo da sucesión de mentiras
vertidas polo alcalde en relación coas obras incluídas no Plan de Obras e Servizos
(POS) de 2013, financiado nun 95% pola Deputación da Coruña, Martínez Sanjurjo
recorda que o Partido Popular propuxo executar obras en todas as parroquias,
agás na de Ordes, dado que esta parroquia se beneficiara fai uns meses da
totalidade dos 327.000 € do programa DTC (Unha Deputación para Todos os
Concellos) e de 200.473 € do POS de 2012. Pola contra, o grupo de Goberno non
dou xamais datos das súas propostas, e fixo pública unha primeira nota de
prensa logo do pleno con datos equivocados para o POS 2013.
O descoñecemento e as mentiras
das que fai gala o alcalde de Ordes na súa resposta non resultan sorprendentes
dado que Manuel Regos non asistiu á reunión da Comisión que aprobou a proposta
de obras de 2013 e a comunicación entre o rexedor e o concelleiro de Obras, ao
igual que con outros concelleiros, á vista do que se atreve a afirmar, semella
non atravesa por un dos seus mellores momentos.
Deixación de funcións do alcalde
“O alcalde descoñece a realidade
de Ordes porque escapa dos veciños, dos que só se acorda cada catro anos, pero
tamén porque se distancia do día a día do Concello, no que prefire que outr@s
decidan por el, nunha evidente deixación de funcións”, afirma Martínez
Sanjurjo.
Proposta de debate
Con todo, e para disipar
calquera dúbida, Martínez Sanjurjo (35 anos, só 18 meses de concelleiro) reta a
Manuel Regos (54 anos, 20 anos concelleiro, continuados de 5 anos e 6 meses
como alcalde) a celebrar un debate sobre o estado e as necesidades das
diferentes parroquias do Concello de Ordes para que os veciños podan calibrar
quen é o que mellor coñece a situación real do municipio.
