· O Partido Popular responsabiliza en exclusiva ao alcalde
da recente revisión catastral e pide medidas que minimicen o impacto da subida
· En lugar de revisar o catastro, o Concello podería
reducir dietas e recortar gastos en cartelería, festas, coches oficiais ou no
Museo do Traxe
Ordes, 21 de setembro de 2012.- A recente revisión
dos valores catastrais de Ordes, efectuada por petición do propio Concello,
provocou unha subida inasumible do Imposto de Bens Inmobles (IBI) para moitos
contribuíntes. O Partido Popular atende estes días as queixas de infinidade de
propietarios afectados, que están a recibir recibos con cifras inasumibles para
economías modestas, nalgúns casos con todos ou varios membros da unidade
familiar en paro e con ingresos que non superan os 400 euros.
Ante
as dúbidas suscitadas entre os veciños, e as falsidades vertidas desde o
Concello para tratar de xustificar, mediante enganos, os importes postos ao
cobro, o Partido Popular de Ordes aclara que esta subida ten a súa razón de ser
na recente revisión catastral, solicitada unilateralmente polo Goberno local.
O
feito de que esta revisión implique, en moitos casos, o incremento da base
liquidable, tradúcese tamén na obriga de pagar os atrasos correspondentes en
ata catro anualidades.
Familias incapaces de asumir o pagamento
A
suma destes dous factores –revisión catastral e actualización da base
liquidable- provoca que algunhas familias de Ordes sexan incapaces de facer
fronte ao pagamento requerido. É o caso dunha familia, con todos os seus
membros no paro e so uns ingresos mensuais de 400 euros, á que lle reclaman
case 1.000 euros, ou o de outra, que cos atrasos de 4 exercicios, que deberá
pagar arredor de 3.000 euros de IBI este outono.
O Concello debe minimizar o impacto do recibo
Neste
escenario, o portavoz municipal do Partido Popular de Ordes, José Luis Martínez
Sanjurjo, insta ao Concello a habilitar os mecanismos necesarios para minimizar
o impacto da subida do IBI sobre as economías familiares.
En
opinión de Martínez Sanjurjo, o sensato sería que, en lugar de ter ordenado a
revisión catastral, o Concello de Ordes aplicase un plan de axuste recortando
en gastos innecesarios, como as dietas de 190 euros que percibe cada
concelleiro de Regos por asistir ás Xuntas de Goberno local, ou as dos plenos e
comisións, como solicitou o PP recentemente.
Poderíanse
recortar tamén os gastos en cartelería, en festas, en vehículos oficiais (sobre
os que non existe control algún e mesmo utilizan persoas alleas ao Concello),
no Museo do Traxe, e así ata completar un largo etcétera que evitaría esta suba
“brutal” da contribución.
